കഥകളിയിലെ താളമേളങ്ങളും നർത്തകർക്ക് ചേരുന്ന വേഷഭൂഷാദികളുമാണ് കേരളനടനത്തിന് ഉപയോഗിക്കാറുള്ളത്. ചെണ്ട, മദ്ദളം, ഇലത്താളം, കൂടാതെ ഹാർമോണിയം, തബല, സിത്താർ തുടങ്ങിയ സംഗീത ഉപകരണങ്ങളും ആവശ്യത്തിന് ഉപയോഗിക്കാറുണ്ട്. ഭാരതത്തിലെ ഏതുഭാഷയ്ക്കും യോജ്യമാണ് കേരളനടനം.നടനചാരുതയും അവതരണ ലാളിത്യവും കേരളനടനത്തെ ഹൃദ്യമാക്കുന്നു.
സാമൂഹിക സമകാലിക വിഷയങ്ങൾ അവതരിപ്പിച്ച് ജനശ്രദ്ധനേടാൻ ഏറ്റവും പറ്റിയ മാധ്യമമാണ് കേരളനടനം എന്ന് കണ്ടാണ് സാമൂഹ്യ നാടകവും കേരളനടനവും സമന്വയിപ്പിച്ച നൃത്തനാടകം, സാമൂഹിക അനീതിക്കെതിരേ ആഞ്ഞടിക്കാൻ നവോത്ഥാനകാലത്ത് ഓച്ചിറ ശങ്കരൻകുട്ടി പ്രയോജനപ്പെടുത്തിയത്. ആദ്യകാലത്ത് ഈ നൃത്തരൂപം കഥകളി ഡാൻസ് എന്നാണ് അറിയപ്പെട്ടിരുന്നത്.
കഥകളി, വിദേശികളുടെ അംഗീകാരം നേടുന്നതിനു മുൻപുതന്നെ ലോകമെമ്പാടും പ്രചാരം സിദ്ധിച്ച കേരളനടനം, സാക്ഷാൽ കഥകളിക്കുതന്നെ ലോകപ്രശസ്തി നേടിക്കൊടുക്കാൻ നിർണ്ണായക പങ്കുവഹിച്ചു.